始終我都相信，蒼井空老師是世界的，也是我們的。蒼井空老師公開咗徵男友條件，只要月入2.1萬蚊、25歲至45歲、孝順父母、為她着想同最重要每年可以去旅行……即使係平凡像本地大學畢業生每月賺得萬三蚊，都會覺得蒼井空老師係等緊我。
為咗證明畀蒼井空老師睇，每年能夠去旅行，即坐言起行，暑假plan去日本。睇吓日圓個價，Yen又升咗嘅喂，仲撲向7.3算。好似我哋呢啲遊日L，日圓再貴都撲唔熄去玩嘅欲望。但話時話，日圓兌美元喺第三季再升機會大，升見105水平又幾出奇。唔係執大行口水尾，美國上星期五就業數據差到離晒地，美元即時跌散。數數手指，仲有廿幾日又英國脫歐公投，買定日圓避險都啱數。不過，聰明錢上星期似乎睇定啲先，CFTC資料顯示日圓淨好倉合約得1.48萬張，比前一星期的2.2萬張少好多，睇嚟市場並非一面倒睇YEN升。日本擔心日圓滙率波動外，佢哋都好怕人仔貶值。日本好多大企業都面向中國市場，好似無印或Uniqlo，喺內地市場銷售佔整體比重越來越高，日圓升值，人仔跌，因為滙兌因素而賺少咗。人仔唔見使，日本旅遊最大財主中國旅客爆買力不再，呢兩年急速擴張嘅藥妝店同零售業下場會點，睇睇今日香港可能搵到答案。
Captain Cool
本欄逢周一刊出