喺奧脫福隔籬開咗間酒店嘅傑斯同埋加利佬，無嗱嗱由酒店大亨變淫業大亨。英國小報日前爆料，有曼聯職員喺佢哋間酒店召妓，事後仲要求個妓女拉開窗簾，赤裸上身揸住張寫住「雲高爾拜拜！」嘅紙同奧脫福影相，似乎有心整蠱曼聯同埋傑斯囉。
篤定喺摩連奴上任後離開曼聯嘅傑斯，舊年三月同加利尼維利喺奧脫福隔籬，開咗幢有133間房嘅四星級酒店Hotel Football。由於間酒店近球場，人流旺兼多麻甩佬，所以就俾一個網上賣淫集團租嚟做生意，旗下一個叫Kat Lee嘅妓女仲向英國《太陽報》爆料，喺上月26號有紅魔職員喺度幫襯。聲稱英國著名藝人Jimmi Harkishin都幫襯過佢嘅Kat話：「嗰個男人以Kuds名義預約，話自己喺曼聯做嘢，但冇講明做乜。佢真係好鬼神秘，約我喺酒店後門等，之後前後腳上酒店。佢仲話識酒店啲職員，所以提醒我到時咪咁大聲，以免俾人知佢嚟咗。」
至少十多名妓女進駐
話收咗呢個曼聯職員150鎊（約1,700港元）肉金嘅Kat補充：「完事之後我哋傾咗幾句，仲講到雲高爾俾曼聯炒魷魚；佢要求我赤裸上身揸住張寫有『雲高爾拜拜！』嘅紙，拉開窗簾同奧脫福影相。之後我哋就各有各走。」Kat仲話Hotel Football已變成淫竇：「我喺度做咗八個客，我間公司有成30個女仔。我唔知有幾多個人喺度做生意，但起碼有十幾個。我唔知傑斯會點諗，但係佢個底都一早花晒（勾二嫂同搞婚外情），所以唔覺得會對佢有影響囉。」英國《太陽報》爆大鑊後，曼聯同傑斯肯定會做嘢，酒店短期內會變番乾淨，但過咗一排之後，可能又會變番淫竇囉。
瑞典肯放伊巴去簽約
另外，有指家陣係自由身嘅瑞典前鋒伊巴謙莫域喺6月30日前唔簽其他球會，巴黎聖日耳門就會畀400萬鎊（約4,500萬港元）忠誠獎金佢，所以佢都猶疑應該盡快同曼聯簽約，定係攞咗獎金等七月一號先簽。瑞典國家隊亦好撐佢，表明如佢喺決賽周期間決定到去向，就會放佢去簽約之後再歸隊。