聯想控股（3396）董事長柳傳志嘅寶貝女柳青，近期為咗滴滴出行而變得好高調。滴滴較早前得到蘋果公司注資10億美元，柳青隨即成為傳媒訪問對象，近日對手Uber獲沙地巨額投資，佢好似就不時冷嘲熱諷作回應。
柳青日前接受美國財經網站CNBC訪問時語帶譏諷咁話，Uber幾得人鍾意，事關佢都未見過一間公司會喺自家App上提起對手品牌。
佢指，Uber喺自己App度宣傳，指服務價格低過滴滴30%，每程只需5元人民幣，1美元都唔使。柳青認為，此舉證明，滴滴有較好嘅服務，所以佢希望多啲見到呢類宣傳。
其實成件事可能源於Uber上周四宣佈獲得沙地主權基金投資35億美元（272億港元），柳青當日已經回應話，雖然滴滴本輪融資仲進行緊，但籌集到嘅資金已超過Uber剛宣佈嘅35億美元。好似有啲葡萄味咁喎。