相信上一代人對宣傳清潔香港嘅綠身紅點「垃圾蟲」卡通公仔，好有感情，但喺唔少人對拒絕遺忘嘅事件、聲稱要畫上句號嘅年代，垃圾蟲都同大家say goodbye。食環署最近推出新icon「清潔龍阿德」（圖），委任佢做清潔香港大使兼為佢推出facebook專頁，將宣揚清潔香港嘅訊息傳承落去。
開fb專頁推銷本土情
「清潔龍阿德」都係綠色恐龍，佢着工人褲，有自我介紹短片兼sell埋本土情。fb專頁話阿德「土生土長唔離地」，「勁Like乾淨，為人最唔話得，鍾意幫人，仲成日坐唔定四圍騰，由坐紅Van到地下鐵碰着她，真正熱愛香港地，口頭禪：做乜？一定得！」
可能驚引發太多批評政府嘅留言，fb講明「阿德最怕人講粗口，呢度只係阿德account，唔係官方申訴渠道嚟㗎」。