係人都知效力巴塞隆拿嘅巴西球星尼馬表演慾強，嚟緊觀眾就有機會喺大銀幕睇吓佢啲演技，係咪同佢啲球技一樣咁得。外國傳媒指，尼馬因為踢奧運而唔使玩美洲盃，就趁得閒走去拍電影，仲有份演出荷李活巨星雲迪素套新戲《3X反恐暴族3》，但暫時未知角色係乜同戲份有幾多。尼馬日前完成咗首日拍攝之後，雲迪素仲喺社交網站讚佢演技好：「好開心宣佈尼馬完成佢喺《3X反恐暴族3》嘅首日拍攝工作，佢真係演得好自然。」