馬圈有云騎師餓馬，你睇杜利萊就知。呢位法蘭西悍將早排不小心策騎被罰停賽兩日，這天刑滿重投戰陣，第二場五班草地2000米，佢即以鄭廐「好腳頭」後上爆冷建功，停賽復出順利旗開得勝，過終點觸線時，杜利萊更擺晒pose給記者影相，似贏大賽般勁high。
無巧不成話，杜利萊今季開齋馬贏泥地的「仁仁友福」亦係來自鄭俊偉馬房，「好腳頭」之前只贏過泥地1800米，這天敲響草地勝鼓，同時係鄭、杜呢對華洋練騎季內首度合作勝出草地戰，「好腳頭」單Win及組合獨贏A2分別派147及46元正。
今場賽事，末段「大寶庫」一度衝上透出帶離，以為贏得，可惜呢匹5.7倍大幅落飛啡燈馬，在史卓豐胯下太早出頭，以致拉士力弱埋唔到尾，俾「好腳頭」任過唔嬲，最終只得第二名，落飛黨涉及的150萬注碼獨贏泡湯。
今場三、四名則由一對冷馬「糖黐豆」及「帝國之星」後上瓜分，四重彩派八萬一千幾。