前日六四事件27周年，唔少政黨都喺維園外開站籌款，其中為選舉成立嘅香港眾志一度喺街站同愛字堆有衝突，又一度被警方包圍，但無礙佢哋嘅吸水力，眾志主席羅冠聰話呀，佢哋籌到45萬，係除大會支聯會以外，有公佈籌款數目嘅政團組織最高紀錄。
公民黨籌到28.7萬，成績唔錯但就少過上年嘅29.9萬；近期喺筆架山掛過「毋忘六四」Banner嘅社民連就籌到22.6萬（如果計埋收到過百萬嘅陰司紙，其實跑贏其他政團㗎，係咪大吉利是？）工黨都籌到9.5萬，新同盟籌逾6萬，多過去年嘅4萬，人民力量截稿前仲未計到數。
至於民主黨，則係零收入。大家唔好驚訝住，唔係因為佢哋已經冇人支持，而係有別於其他政黨，佢哋年年六四都只會為支聯會、而唔會為自己個黨籌款㗎。