唔識民協何啟明，有乜咁出奇？至於工聯會嘅何啟明，更加係識得先出奇！八方無啦啦提起兩個同名同姓嘅人，唔係因為佢哋特別神奇，只係因為呢兩位仁兄，同樣係區議員，且極可能嚟緊9月一齊參選立法會，雖然出選唔同界別，但有望創選舉歷史。
都係80後區議員
先講民協何啟明，27歲嘅佢一擊即中，去年底喺區選於深水埗當選區議員，民協對佢寄予厚望，爭取由佢代表老將馮檢基喺新一屆超級區議會出戰，同其他大佬級人馬一決高下。
工聯會嘅何啟明30歲，係觀塘區議員，據聞會與工聯會另一區議員、元朗區嘅陸頌雄一齊喺勞工界出選。而佢獲欽點上陣嘅原因，據聞長遠係要喺九龍東接班。
八方發現佢兩個連個樣都有啲似，難怪有傳媒試過將佢哋兩個人搞錯，似乎要諗計仔等大家區分吓。