月尾路經大阪的你要注意！日本地鐵電車，一向都准許飲食，但今次再去盡啲，由6月22-25日，中之島噔（京阪中之島線）將會變身居酒屋，三號月台會擺滿枱凳及舊式圍爐，旁邊設有立飲立食區，2200列車更會停泊月台，車廂內鋪上地蓆供人席地而坐。場內有得飲亦有得食，啤酒清酒燒酎有齊。有小攤檔賣拉麵、關東煮，到時仲會有一系列餐廳喺現場搞pop-up，入場費1,000日圓（包一張飲品券），場內飲食需另外付款，五點開場，九點最後入場，玩足四個鐘之後都仲又車搭返酒店。星期六最後一場，仲特別由下午兩點開場，有興趣者要把握機會啦！諗起喺香港搭地鐵飲啖水都要罰$2,000，難免有啲欷歔嘅感覺。
記者：盧懿靜
資料來源：Rocketnews24