昨日下午本來好想到跑馬地教堂出席C夫人嘅追思彌撒，不過成班金融銀行界老友在六月四日之前收到訊息，C家因交遊廣闊，朋友滿香江，對此事採取低調處理，事前不發訃聞，希望避免大量人士擠滿教堂，對他人釀成不便，更加懇辭花圜。我地知道後，老友一致同意尊重家屬意願，不去教堂。
C家三代好友R君當然不能不去，佢話順便代表我地向C家致意慰問。R君先父與C先生先父係數十年老友，R君與C先生自細見到大，兩家第三代又係自小玩泥沙，在香港與曼谷，兩家相交近一百年，淵源十分深厚，非泛泛可比。R君最近去台灣公幹，途中驚聞C夫人逝世，急忙趕返香港。我地問及台灣改由女總統蔡英文管治，不知最新情況如何？R君話：「一切都係傳聞，難知真實程度有幾多，台灣政界與商界有好多往來，商界傳聞蔡英文嘅背後就係李登輝，信不信由你！我唯一堅定相信嘅就係到台北之日係下午，竟然在十五分鐘之內可以清關走出桃園國際機場上車去台北，因為眼見只得我地一班飛機降落。即係話，嗰日好少人到台灣，酒店旅遊業唔慌會好景咯。你得閒就去台北行街買嘢啦，支持第一位女總統呀！」
支持蔡英文，幾時輪到我地吖，首先係要台灣漁民、農民支持。例如馬英九在任時，堅稱沖之島礁係台灣所有，台灣漁民可往附近海域捕魚，但蔡英文上台後，就含糊其辭，台灣漁民立刻受到影響，不能到沖之島礁附近打魚，令佢地非常不滿。又如美台貿易協定，美國素來立場清楚，一向堅持台灣應該輸入美國牛肉、豬肉。在馬英九當政時期，民進黨鼓動台灣農民反對美台農業貿易，依家到民進黨話事嘞，形勢比人強，又一樣要同美國傾農業貿易。哈，呢次輪到國民黨發動農民抗議嘞，證明台灣政治人物皆是無原則，只是追求短期政治利益之輩，不會為台灣長期經濟發展搵出路與新方向，與昔年蔣經國、李國鼎、孫運璿等人物相差太遠了。蔡英文別號小英，競選講小英就好親切，可以拉票，做咗總統就未免流露小家子氣，睇落幾難打開局面，率領台灣向前衝。小英遇到北京大老鷹，可以話輸人又輸陣，老實講，左丁山幾為台灣經濟前途擔心㗎。