自從4月初太古城間麥當勞閂門大吉，費清有時想廿零蚊食個餐都唔知去邊度好。不過好消息嚟啦！麥當勞自從去年喺金鐘開完概念店之後，似乎食過翻尋味，打算喺太古城開第2間概念店，6月6號下星期一開幕，今次仲推出可以度身訂造嘅限量tote bag回饋食客，紀念吓新分店開張添！
麥當勞全球第一間概念店舊年喺金鐘海富中心開幕，仲記得嗰陣麥記已經推出過白色tote bag畀大家選購。各位tote bag迷注意，機會又來了，今次太古城新店都有限定版tote bag可以換購，而且係為買咗自選漢堡嘅食客度身訂造！只要你喺6月6號到12號期間，選購create your taste嘅漢堡，影低個包上載去facebook或者instgram，加埋呢句Tag「#CREATEYOURTASTEHK」，同一日內帶埋張單據去番太古城分店，就可以換到屬於你嘅限定tote bag啦！名額每日有300個咁多。
今次太古城分店由二期搬番去一期5樓505號舖，據聞呢度係太古城老麥最原始舖位，80年代已經係度開過舖，咁有象徵意義，今次老麥又會搞咩花臣？下星期一自有分曉。
費清＃要生計，也要生活＃毋忘初衷