男又揈，女又揈，禮堂內幾十個學生起勢揮動雙節棍，轉個頭又有另一批面孔來練習「翻山越嶺」、「白蛇吐信」等雙節棍套路。原來他們在準備挑戰健力士最大雙節棍課堂的紀錄。耍雙節棍上堂都可創造健力士紀錄，係真唔係呀？係真㗎，佢哋仲好認真。調景嶺優才（楊殷有娣）書院中學部超過500位師生6月6日會齊集操場耍雙節棍上堂，屆時會有健力士認證官來監察情況，香港雙節棍界知名人士都會一同監場。
講起雙節棍一定會諗起李小龍，不過6月6日，呢班學生從此都會跟雙節棍連繫起來。當日他們要做足課堂應有的熱身，練習雙節棍套路、敬禮等，全程大約30分鐘。幾乎全校學生都參加今次的破紀錄活動，但雙節棍始終係武術用具，家長對於雙節棍真係接受到？校長譚國偉說：「我哋哋兩年前引入雙節棍為課外活動，很受歡迎。其實雙節棍係運動，加上同學用的棍包了軟身海綿，打在身上都唔係好痛，同我哋一般諗嘅舞刀弄槍好唔同，比較斯文。」 校長相當有信心挑戰成功，也謂人生中破一次健力士紀錄很難得，所以家長非常支持。
到底雙節棍有甚麼好玩，令全校男女同學都肯齊齊玩？讀中一的陳俊宇同學覺得耍雙節棍可以像李小龍般有型，又提到導師強調他們舞棍要握棍頭。「雙節棍的確可以用來打人，握棍尾揮出來的力大啲，但我們平日都會握近棍頭位置，細力好多。」
破紀錄當日棍如雨下，幾百人一起揈，怕不怕受傷？中一生曾詠嵐就話：「老師當日會幫我哋哋劃分好，每人站一格內，點揈都應該安全。」
不停唸雙節棍口訣指導同學練習的導師劉萬梁(Jerry)說雙節棍是一項很全面的運動，能提升敏捷度及反應力，由於有左右手交替動作，更可以激發左右腦的潛能。
練習當日，記者發現有些同學舞得有板有眼，有些則未必能完全掌握節奏。Jerry謂：「學生學習程度當然有參差，不過大會並無要求佢哋哋必須耍出高難度招式，反而重視佢哋哋有冇全情投入課堂。」有些學生跟不上，吐吐舌頭又再努力，態度不俗。
本身是中國國際雙節棍聯盟黑帶四段高手的Jerry說：「全世界史無前例，香港首次咁做，我覺得係我人生中最值得驕傲嘅嘅事。」到底6/6佢哋呢件事成唔成事？果籽當日會繼續跟進報道。
記者：葉青霞
攝影：伍慶泉