劉錫明闊別香港舞台多年，前晚在灣仔會展舉行的「YES！25週年演唱會」重登香港舞台，其他演出嘉賓還有譚詠麟（阿倫）、草蜢、孫耀威、王灝兒（JW）、Super Girls（SG）及林德信等。捧場藝人有錢嘉樂夫婦、梁靖琪、文頌嫻及周家蔚等。場內入座率9成，場外還有各演出嘉賓的1比1人形紙牌公仔，又擺放了20部《YES！》扭卡機，讓觀眾重拾當年扭卡的美好回憶。
阿倫壓軸
演唱會由草蜢打頭陣，蔡一智、蔡一傑兄弟大爆蘇志威當時儲下不少劉小慧閃卡。而林德信、JW、SG、顧芮寧、孫耀威及內地女子組合S.I.N.G等相繼出場，雖然台下反應一般，但每人也很落力演出，其中SG穿高踭鞋又唱又跳殊不容易。
至於當年因公開承認對周慧敏有好感，而被倪震在《YES！》公開唱衰了17年的劉錫明，當時更慘遭起名做「毒瘤明」，致人氣急跌敗走台灣。是晚大會司儀竟繼續以「毒瘤明」之名介紹出場，唱功依然的他在台上說：「我哋好耐冇見，我諗都有20年。好多朋友都擔心我嘅健康，好多人都擔心我真係有毒性，託賴，我身體好好。」譚詠麟則以壓軸身份出場，演唱了多首金曲。
有意回流
完騷後劉錫明接受訪問，他表示相隔二十多年重踏舞台，一切以平常心面對。有否想過可能會遇見倪震？他說：「冇諗呢個問題，隨緣，見到就見，見到冇乜好尷尬。」他坦言已經有廿幾年沒和周慧敏聯絡。談到大會以「毒瘤明」作介紹，他笑說：「我係坦然面對呢件事，我喺台上解釋得好清楚，因為呢個名令到好多人記得我，亦都帶出好多歡樂，始終仲有呢代人記得我，好彩我唔係惡性。」劉錫明直言有意回港發展，只要有聽眾，絕對願意再出碟開演唱會。
SG受訪時指小時候有儲《YES！》卡，想不到現在會成為主角。
採訪：盧妹
攝影：仇志德
