英格蘭周四喺溫布萊靠基斯史摩寧建功，1:0險勝缺少基斯坦奴朗拿度（C朗）嘅葡萄牙，挾友賽三連勝氣勢出征歐國盃；不過，最開心嘅都係曼聯新帥摩連奴。呢位座上客有囡囡瑪泰德帶埋男友陪伴左右，紅魔球員又咁對辦，真係事業家庭皆得意！
英軍領隊鶴臣派哈利卡尼、朗尼同占美華迪三箭頭攻堅，但製造唔到太多威脅，最驚險一幕係34分鐘，卡尼喺中圈附近俾葡軍嘅般奴艾維斯一嘢天殘腳踢中個頭，好彩冇咩大礙，艾維斯張紅牌就走唔甩。英軍打多個，都要到85分鐘先靠史達寧傳中，史摩寧頭槌破網贏1:0。
曼聯兵兩仗連入三球
自從摩佬上周五「入魔」，英軍翌日就靠拉舒福特同朗尼建功贏澳洲2:1，計埋今場，英軍連續三個入球都係靠「魔兵」，鶴臣睇嚟要請飲茶先得。摩佬近排潮玩ig，呢次一樣「相機睇先」，連張相都有性格過人，淨係睇到五個背脊。好彩囡囡瑪泰德嘅男友格拉咸post番張正面相，見摩佬面露笑容，唔通好滿意未來女婿？組軍方面，摩佬除咗有意用破英國轉會費紀錄嘅6,000萬鎊（約6.73億港元）斟祖雲達斯中場保羅普巴回巢，又會向門將域陀華迪斯同中場卡域克開一年新約。另外，雖然下周日喺奧脫福舉行嘅慈善賽，佢唔會帶領英格蘭明星隊出戰雲尼亞里領軍嘅世界明星隊，但周五照出席操練，仲同雲尼亞里攬攬，一泯兩代車路士領隊之仇。
大慈善家C朗捐歐聯獎金
至於C朗未歸隊一樣冇偷懶，喺ig上載自己跑步加操嘅相；查實佢為善一樣不遺餘力，有西班牙記者爆料話C朗將60萬歐元（約520萬港元）歐聯冠軍獎金捐晒畀慈善機構，大慈善家當之無愧。