白鴿黨主席劉慧卿嚟緊星期一將率領6名黨友去日本，同日本國會議員、日本外交部等官員會面。
卿姐噚日同八方講，唔少黨友出發前問佢，究竟此行有乜dress code？因為聽聞日本好熱，梗係想着得越簡單越好，卿姐話已叫黨友要着得又薄又斯文，千祈唔好着到好似去旅行咁，而重中之重嘅係，要檢查清楚對襪有冇窿，因為日本好多餐館都要除鞋，話以前試過有朋友因為對襪穿咗窿，結果入到餐館時勁尷尬。
卿姐又話，早前同駐港日本領事食晏時，提過十幾年前去日本食過全雞宴同豆腐宴後，印象至今好深刻，覺得真係好好食，近日就收到日本領事館電郵通知，話已安排卿姐同黨友喺東京再品嚐上述食物，令卿姐覺得日本人真係好細心，相信此行除咗做正經嘢，亦可順道食到唔少美食喎。