立法會噚日審議截取通訊條例草案期間，長毛不滿發言時，附近金融界議員吳亮星喺度聽音樂、食花生同埋笑，於是向曾主席投訴，話「隔籬有狗吠，有人喺度笑」，希望阿曾裁決阻止，惹來民記葉國謙不滿，即時大鬧，長毛反指︰「喺醫院你哋就惡晒，呢度唔輪到你講嘢！」
阿曾不滿長毛離題，就話︰「如果你要講呢啲說話，你出去講，你要就議題發言，否則我命令你離開會議廳！」長毛叫阿曾唔使咁勞氣，話知道佢嘅發言唔啱阿曾聽，「但呢個就係議會一部份」，之後就散會。不過好戲尚在後頭，阿曾會後先睇到長毛違規着短褲開會，話佢咁樣着唔得，仲即場抽佢水，叫佢喺外面着番條長裙咁話。