榮智健愛駒、練馬師蔡約翰的「東方快車」上半季三捷係威係勢，甚至喺1800米一級賽香港經典盃排最外檔冇遮擋之下，只輸頸位得季軍。
可惜「東方快車」畢竟太質新，夾硬催谷進度角逐香港打吡，結果此駒喺打吡有頭冇尾只跑第九。輸完之後，隻馬終於有得休息，一直冇再出，呢日係佢打吡之後首度試閘，喺雷神莫雷拉胯下，試沙田第一組1200米泥閘，早段守三四位，末段刻意考驗推騎追上，反應甚凌厲，亦顯得輕身有勁，以馬頸位之先力壓「盛勢」勝出，季軍是「正是你」。
「東方快車」只評86分，今季仍不乏賽程選擇，大家要留意佢喺香港經典盃得平頭季軍，同佢平磅下平頭衝線的綠魔「有得威」現評105分之高，「東方快車」比「有得威」低出19分，可想而知肯定尚有大幅上升空間，所以稍後復出隨時即勝。