近期政壇有張面孔，曾於敗選時掀起全城熱烈彈琴嘅鍾樹根，突然人氣逆轉，令全城跟佢高呼「要本土，也要分離」，力撐佢退黨保平安「把根留住」。Tree根笑意盈盈，仲識講笑話猶如瘜肉要被割，似乎喺呢場留低比離開更困難嘅角力戰，佔緊上風，無論最終係咪同民建聯「分裂」，都已經贏番個彩。
人氣王近日亦成為抽水對象，同Tree根激辯過何謂本土嘅新同盟范國威，喺fb貼咗張同Tree根嘅拗手瓜照片，留言支持Tree根退黨參選 ，仲製作「Tree根寶寶點算好？」圖像，用emoji解構對方留定退更好。咖喱范同八方講，以上作品純粹呃like，但如果要嚴肅講句，都贊成Tree根求退，皆因可以唔使再做奴才，以獨立思維從政喎。
講到抽水，又點少得近期頻頻同葉劉開拖嘅田少？自稱「無知的田毛毛」喺fb向「根毛毛」發信，話見到根毛毛近期抽黃之鋒水籌錢，都幾有創意，但創意卻未必換到民建聯支持Tree根出選，反建議佢叫葉劉退位讓賢，咁民建聯咪可以出番兩隊，皆大歡喜喎。