96年港姐冠軍李珊珊，前晚宣佈決定拍賣港姐后冠行善，但大部份港姐冠軍都堅持保留后冠做紀念。
袁詠儀（90年冠軍）
「呢個係珊珊個人決定，即使義賣后冠，都唔會改變佢係四料冠軍嘅事實，我就會將后冠收藏，因為試過朋友嘅小朋友聽到媽咪介紹我係港姐，露出懷疑眼神，我每次都要出動后冠證明。」
譚小環（94年冠軍）
「我尊重珊珊義賣后冠決定，我就唔捨得，因為對我嚟講好有紀念價值，雖然我嗰個係朱義盛，但都會一直保留，𠵱家收埋屋企床下底。每年大掃除都拎出嚟抹吓，佢已經生銹同埋甩咗啲石，我得閒要去深水埗配番。」
向海嵐（98年冠軍）
「我個后冠放喺保險箱，開保險箱時會順便探一探佢，后冠對我嚟講意義好大，會留畀身邊人做紀念，我未有小朋友，可能會留畀契女。我支持珊珊決定，佢講得啱，始終係一件物質，可以賦予佢更深一層嘅意義係好事。」
楊思琦（01年冠軍）
「珊珊有善心，將咁有紀念價值嘅港姐后冠拎出嚟同大家分享，我嘅后冠寄存喺保險箱。」
葉翠翠（05年冠軍）
「我未諗過變賣后冠，但我尊重珊珊義賣港姐后冠決定。」
張嘉兒（07年冠軍）
「珊珊將拍賣后冠款項捐做善事，希望佢賣得高價，佢好有善心。」
