中國銀行拆咗隻飛機租賃公司出嚟喺香港上市抽水，掘咗87億元返去，點知特首梁振英即時獻上「死亡之吻」，喺網誌提一提，就搞到噚日隻股插水，股價跌穿招股價，買咗貨嘅股民，今劑真係多得「梁大師」唔少。
梁振英前日寫網誌（圖），話好開心見到有間飛機租賃公司上市，話「十二五」規劃入面，提到香港航運中心地位，當時已話航運唔止海運、空運，仲包埋相關金融業務，亦即係飛機租賃，謊死人唔知佢先知先覺。
雖則佢唔開名講邊隻股，但係人都知講乜啦，堂堂特首好似變咗財經演員咁，但勢估唔到佢捧一捧之後，即刻搞到中銀航空租賃（2588）噚日跌咗3%，收報40.65元，比招股價42元跌咗3.2%。不如全職做「股壇明燈」，話唔定民望好過做特首。