港島立法會選舉真係未選舉先興奮，先有魔童王維基空降搞局，再有民記「棄根」搞到鍾樹根企出嚟同個黨反面，下星期據聞就輪到自稱「港版Donald Trump」詹培忠出場，盛傳佢周一會宣佈考慮出戰港島區立會選舉。詹培忠噚日接受電台訪問，聲言為狙擊梁振英而戰，有同佢傾過選舉嘅政界人士話，詹培忠對自己充滿信心，連西環都唔會畀面。
唔使睇西環台戲
詹培忠噚日接受dbc節目《最好的時光》訪問，大談參選原因。節目周日播出，八方聽聞，金勞詹表明追究梁振英UGL收錢事件，同時質疑「梁粉」張震遠點解可以「凌架法律」（大家仲記得，金勞詹係張震遠前債主嘛？）以及不滿廉署成為梁振英工具云云。
據知金勞詹仲自爆，曾被人勸佢唔好參選，咁係咪中聯辦出手？佢就話唔講中環定西環，但霸氣豪言：「監都坐過，我有乜怕?」強調唔怕選輸，亦唔會同人配票，只希望今屆選舉畀多個選擇大家。
有同金勞詹老友傾過選舉嘅政界中人同八方講，金勞詹對自己參選充滿信心，好豪氣話冇乜階層嘅票佢係拉唔到，又講笑話自己坐過監，可以連在囚人士票都拉埋，其他候選人都做唔到！至於金勞詹會唔會到最後關頭，又俾西環勸退？呢個政界中人話，佢覺得機會不大，其一係金勞詹有錢又無求，根本唔使睇西環台戲，再加埋佢老哥出得山，都係為咗啖氣多過為政治虛名，西環有乜可能㩒得佢住？
mailto:[email protected]