韓國性感女團EXID近日推出新碟回歸樂壇，不過新歌《L.I.E》MV就被批有意淫成份，但成員懶理是非，如常出席活動谷新歌。女星每次回歸前都例必要減肥，即使好似EXID咁弗爆都唔例外，成員率智就透露曾經因為節食而匿喺廁所喊，認真慘情。
在前日播出嘅電台節目《兩點出逃Cultwo Show》中，率智表示：「我哋五名成員都好鍾意食雞腳同肉。」又透露成員個個都好大食，唔可以捱餓，不過為咗減肥，EXID都要節食，率智話：「捱餓唔食嘢真係好痛苦，幾日前當我冇食過嘢落肚時，我真係冇晒力量 ，我明白到捱餓係絕對行唔通。」隊友慧潾踢爆：「之前率智姐姐要減肥，我見到佢匿喺廁所喊住咁問『點解佢哋唔畀嘢我食？』」率智解釋：「我係嗰種有嘢食就有力量唱歌嘅人，我工作係為咗生存同食，但佢哋唔畀我食，所以當時我好嬲。」
粉絲知道之後就梗係力撐率智，認為公司唔畀成員食嘢嘅行為過激，亦有人認為好多女星減肥減到走火入魔。