黎美言（Winkie）去年參加ViuTV的MMA真人騷節目《G-1格鬥會》，節目引起極大迴響，不但是女子拳拳到肉的擂台肉搏，八位參賽者的是非更沒完沒了。Winkie被指博出位、寸嘴、加上擂台上過狠的表現，被封獨孤精、犯眾憎，她為了是非躲在家裏哭，遮掩着女孩懦弱一面。最終她站出來選擇堅強，保持沉默，賽事完結了，雖然輸了比賽，卻贏了心態。Winkie說：「打完心態強咗好多，捱過咗就會見到彩虹。」
節目帶挈增工作量
Winkie與「晶女郎」唐紫睿（Hazel）、2013年退選港姐劉燕妮（Rika）的過節最深，Rika被打到變豬頭，宣佈退出娛樂圈，Hazel出口相助，問Winkie會否覺得有責任？她說：「參加得就要尊重比賽，我受傷都唔會出嚟同人講，打得比賽冇得怪邊個，我投入、認真咁比賽，問心無愧。女仔係多啲婆媽，對方做乜嘢決定我控制唔到。俾人話犯眾憎我冇feel，乜嘢都牽動到我，人生咪好多嘢唔開心？有朋友唔需要同人講。」
ViuTV正開拍第二季，找來多位舊選手參加挑戰賽，卻沒有Winkie的份兒，問她是否避了是非而不接拍？她堅定地說：「唔係！我絕對唔怕！因為老闆同媽咪唔畀，有是非即係多人留意，係好事，又唔係我親手製造，對方訪問提到自己，證明我有存在價值，唔參加係因為第一季輸咗，面子問題，第二季就一定要贏，無謂咁大壓力，攞唔到冠軍咁點？唔玩啦！」
比賽結束，Winkie考了泰拳教練牌，一星期教五天拳，最近她又獲邀到內地拍攝網絡電影，飾演打女，《G-1》似乎帶挈她另創一番事業，Winkie說：「我都覺，但唔會focus，純粹興趣，想分享泰拳嘅快樂，我最鍾意係幕前，會視幕前係我嘅終身職業。」
採訪：羅慧敏
服裝提供：snidel
化妝、髮型：Faye's Makeover
場地提供：Feelness EMS Power Loung
