美斯（圖）最近除咗備戰美洲國家盃之外，亦要為開始審訊緊就佢涉嫌喺2007至09年逃稅一案而煩惱。西班牙法院喺周三傳召咗六位證人作證，佢哋都係當時負責美斯肖像權律師行嘅員工，而佢哋嘅證供似乎對美斯有利，話有關合約全部都只係透過美斯爸爸同哥哥商討，律師行甚至冇直接聯絡美斯本人嘅電話或電郵。美斯同佢爸爸喺周四作供之後，審訊亦會結束，之後將會裁決。另外，巴塞隆拿體育總監羅拔費南迪斯證實，巴西守將丹尼爾今夏離隊。