睇親藝術品都係隔住玻璃都幾冇癮，不過中環海濱即日起至8月14日舉行嘅哥倫比亞著名藝術家博特羅（Fernando Botero）免費戶外展覽，9座肥嘟嘟、滑捋捋、高2至3米嘅青銅雕塑進駐草地，就可以畀大家任睇任摸任selfie。
博特羅係當代最出名嘅在世藝術家之一，作品最大特色係體態豐盈線條圓滑，大師希望大家撫摸作品感受佢創作時嘅快樂。不過佢已經84歲，因為背痛所以兩年前停止再做雕塑，今次揀咗其中9件來港，有好多座都以女人為主題，包括《抽煙的女人》、《女人軀幹》等。
睇唔明作品唔緊要，主辦單位提供中文或英文預約導賞服務，市民可去網站瀏覽詳情 http://www.boteroinhongkong.org 。