講到「中環大業主」置地一年一度舉辦嘅慈善活動「鼠戰中環」，除咗一班中環精英扮鬼扮馬參賽籌款，當然仲有動作多多、非常鬼馬嘅「鼠大班」。不過咁，由2006年活動開辦至今，鼠大班都係着住套間條西裝，多年嚟都冇換過衫，其實置地有冇諗過幫佢換吓個look呢？
期望今年籌款破紀錄
噚日置地行政總裁彭耀佳出席活動記招，佢透露，今年初真係有諗過幫鼠大班換套靚仔新衫㗎，但由於今年係「鼠戰中環」11周年，單係設計新嘅比賽內容與場地擺設已經非常忙碌，所以暫時擱置換衫大計。
佢預告，明年有機會見到鼠大班嘅新look。至於彭耀佳計劃以乜嘢特別造型，喺10月16日活動舉行當日現身，佢就話要賣關子喎。
講到𠵱家香港經濟與零售市道麻麻哋，投資銀行、銀行相繼裁員，好多打工仔都好心寒，擔心下一個輪到自己。
彭耀佳回應話，希望活動可以為市民打打氣，「生意做得唔好，可能心情唔太靚，希望鼓勵大家喺生活中有正面思想，又幫助到有需要嘅人。」
佢仲話，過往每年籌得款項都破紀錄，期望今年籌款金額超過舊年嘅323萬元。
籌款當然係重點，不過港人咁鍾意selfie，所以置地喺交易廣場中央大廳展覽設置咗影相區，今日起至21日，公眾可透過AR（擴增實景）同虛擬鼠大班合照。
李華華
mailto:[email protected]