不少朋友在工業區工業大廈租咗單位，或者佢哋係最醒目之人，十年八年前已經買定一個小型單位，做儲物室，圖書室，紅酒室，雜物房之用，最多人在火炭、柴灣或觀塘設立呢類家庭式輔助廳房，一對夫婦租用近千呎單位用嚟做新式廚房、客廳、K房，招待親友或廿幾人派對之用，真係幾過癮㗎。
朋友B最近在火炭租咗一個劏房式工廠單位，就係用來擺放家中客廳冇法子容納而又暫時唔捨得掉嘅舊書報與雜項紀念品，所謂劏房式工廠單位並非係住宅用途嘅，朋友B帶左丁山去參觀，原來係一幢多層工業大廈分層出售，有聰明廠家買下一層，將全層間格成二十幾個單位，戶戶有窗，獨立冷氣電錶，公用廁所；入到去，全層樓非常寧靜，全無機器、生產嘅噪音，可想而知，全部單位都係租俾人做小辦公室或儲物室之用嘅。中環亦幾流行劏房式寫字樓，每個單位二百呎左右，呎租高達五十幾六十元，左丁山去睇過一個，要求呎租係一百元以上，比全層樓打通嘅市值租金貴出兩倍幾，總之，small is expensive，計總租金雖然係一萬元上下，但呎租就幾高昂，聰明業主梗係識得如何收入最大化啦！
朋友B嘅單位幾實用，月租唔夠一萬，雖然擺滿舊書與雜物，還留番一個大空位，用嚟做乜呢？朋友B話：「正在周圍睇緊有乜嘢靚嘅又夠重嘅防火式夾萬，買個夾萬返嚟存放樓契以至若干貴重物品。」有夾萬，擺放在家唔係更加放心咩？朋友B話：「我驚住普通住宅嘅地板負荷力唔夠大，呢類工業廠房既然以前可以放置生產機器，生產線，我用來放重型夾萬，濕濕碎啦，夾萬夠重，賊人嚟偷都難以搬得郁㗎嘛。」果然有諗頭，肥仔K話現時日本人時興買小型夾萬擺放在家，以應付負利率，既然存款在銀行冇利息，仲隨時要俾手續費，不如將現金放在屋企夾萬好過，日本人還是普遍用現金多過香港人好多，夾萬係夠實用嘅。香港情況又如何呢？南華早報五月三十日報導，滙豐銀行最近發出通知保險箱客戶，銀行有權窺探（snoop）保險箱有無可疑物品，引起資深大律師蘇朗年（Neville Sarony）公開抗議，指滙豐嚴重侵犯私隱。哦，如果間間銀行如此做，朋友B買夾萬好有需要咯。