今屆立法會選舉真人騷花生指數爆晒燈，尤其港島區，除咗維基肯出征同Tree根擬退黨嚇你一驚，前立法會金融服務界議員詹培忠都考慮憑佢十大票源，例如監躉票同球迷票等，喺港島殺出血路。
由於金勞詹向來語出驚人，有時夠膽講出政客未必敢講嘅心底話，所以私下獲封「港版Donald Trump」。原來田少直情就此封號問過金勞詹，引述金勞詹話「直情係啦」，仲補充一句「我識嘢多過Donald Trump」，又指對方話「寂寞過頭，冇乜嘢做」，想藉參選攞平台發表意見。
金勞詹下周一會舉行記招預告強勢回歸，記招地點喺西環……咪誤會，係西環嘅尚品薈，莫非係用行動證明，就算中聯辦所屬地頭，潮州怒漢都冇有怕？