早排大台搞金曲頒獎禮，星期六晚舉行都叫做黃金時間吖，但收視率都係得單位數，史上最差，講真小弟當晚就梗係冇睇，不過其實大台嘅勇氣都好值得稱讚，事關佢哋一季可以頒到20首金曲出嚟。𠵱家唱片業式微，廣東歌市場更加每下愈況，小弟好懷疑一季有冇20首新歌派台，而大台可以頒到咁多金曲獎，呢個「金」字又有幾金呢？
美洲國家盃今年搞個百周年版，講真南美洲得10個國家，唔好講話要踢外圍賽，連搞美洲盃都要搵多兩個邀請國家嚟湊數，先勉強分到三組踢分組賽，仲要出八強㖭，即係淘汰得四隊。今屆叫百周年版，由美國主辦，拉多啲中北美洲球隊參加，先有16隊角逐，場面好睇少少。以往美洲盃排喺單數年，一般強隊都唔會精銳盡出，用幾個主力加年輕球員玩吓，認真意味唔太強，但今年雙數年又搞，撞正歐國盃及奧運，歐洲列強球會真係頭都大埋，可以畀陣中南美兵休息多啲嘅機會都冇。
作為阿仙奴球迷，今季睇住車路士同曼聯先後自爆都唔可以拎番次英超冠軍，除咗李斯特城韌力好強外，仲要怪吓美洲盃。上年阿歷斯山齊士幫智利拎到首冠，搞到又傷又疲咁開「咧」，打擊已經大，雖然季中「山神」休息咗一排，但季尾返出嚟嘅狀態都未起，埋單英超入13球，少過上季三球。
佢今夏又要代表智利爭衞冕，加上奧斯爾、艾朗藍斯、基奧特等歐國盃兵，大半隊冇得休息，下季又有曼聯曼城翻生，阿仙奴奪冠又冇乜機咯。文：牽牛