太陽娛樂老闆周焯華（洗米華）自從同陳慧玲搞離婚，佢同女友Mandy Lieu嘅關係更「名正言順」，𠵱家Mandy留喺英國待產，佢嘅模特兒公司拍檔李月前幾日出活動都破戒「放風」，話Mandy即將會喺倫敦生B仔，坐完月就會帶大女周願同B仔回港同洗米華定居，實行坐正做新洗米嫂。
原本身價5萬
噚日有報道指Mandy回歸後會繼續做幕前工作，更指佢有打算喺8月復出，首先會以名人同慈善界活動做踏腳石。有指Mandy喺未爆出同洗米華戀情之前，活動價大概有5至8萬，但Mandy介入洗米華婚姻之後形象插水，直至近月事件明朗化，有客戶同公關認為Mandy有叫座力，諗住逆市以40萬高價作為復出酬勞。
其實Mandy𠵱家都應該生活無憂，大可以專心湊一對仔女，活動酬金多少絕非首要考慮條件。記者噚日就問過Mandy嘅經理人，佢表示唔會回應Mandy復出工作嘅報道，而公關界亦透露近月市道仍然差，唔少品牌都削減咗活動經費，相信Mandy要高價出山仍有唔少阻力。
撰文：馮仁昭
