對香港傳媒，呢屆美洲盃真係好「雞肋」。寫得多怕冇人睇、冇點擊，始終開波時間唔好，仲有堆唔出名球隊，最緊要係同香港人鍾意睇嘅歐國盃撞到應，唔通有球迷唔睇法國、威爾斯，留力去睇巴拉圭、巴拿馬咩？我唔敢話冇，但應該唔多囉。做得細又唔多妥，始終係洲際大賽，又有巴西同阿根廷，最緊要係有美斯喺度。話晒呢次係美斯贏國際大賽嘅最好機會，如果佢咁都捧唔到盃，真係冇話可說，惟有賴馬天奴啦。
雖然小弟講到美洲盃好似冇人睇咁，但佢嘅經濟價值比大家想像中高，美洲兩大足協同體育市場代理IMG真係賺到笑。舊年美洲盃，南美足協喺商業同轉播收益賺咗7,500萬美元。今屆，北美同南美兩個足協原先以1.12億美元將呢啲權益賣咗畀阿根廷公司Datisa，但因為Datisa涉及貪腐，所以兩大足協再招標，批咗畀IMG。雖然唔知IMG畀咗幾錢買到呢啲權益，但相信唔難賺得番。美洲盃喺美國嘅西班牙語轉播權就畀咗Univision，據報值6,000萬美元，而喺美國嘅英語轉播權就賣畀FOX Sports，都值1,500萬美元。
美洲盃真係唔理你香港多唔多人睇，佢哋今屆之所以大搞同埋搬去美國搞，慶祝百周年只係藉口，係因為由足協、代理、贊助到轉播商都睇中美國體育大國呢嚿肥豬肉。至於美國亦需要搞一次大賽嚟畀國際足協班選委睇，當係選戰，爭取2026年世盃主辦權。文：咖喱