早前同長毛喺立法會會議廳門口開拖嘅工聯會「MC興」王國興，噚日突然以功夫裝亮相立法會，莫非又係大戰當前？MC興解釋，噚日立法會審議《專利修訂條例》，一旦通過，所有發明創造就可以喺香港註冊，有晒本地特色，所以早前搵老婆幫手用千幾蚊買咗呢套「本土特色」唐裝衫，仲寫咗副「實事求是為本土」、「發明專利辟新途」對聯送畀負責處理相關條例嘅局長蘇錦樑。
耍開太極嘅MC興仲主動同記者話︰「不如我擺個功夫pose畀你哋影吖！」即席喺會議廳門口示範「彎弓射虎」、「提手上勢」同「單邊」太極招式（圖）。黃毓民喺立法會走廊電視睇到MC興呢身造型就即場大笑兼話「黐線」，「呢啲叫本土？香港人唔着唐裝衫好耐啦，呢啲唔係本土，係老套！」