「星島日報」報導，政務司司長林鄭月娥最近活動頻頻，傳有出馬入閘嘅心意，但林鄭當然唔認，有人問佢會唔會競選特首，佢答：「應該唔會嘞！」咦，有「應該」呢兩個字，彈性好大啫，如果直接啲講：「唔會嘞！」否認語氣就強好多，林鄭已是官場老手，應付記者叻過不少人，斷估唔會用錯字，用錯語氣。
「星島」又講及林鄭近期最關心三大議題：（一）地鐵加價、（二）領展、（三）取消強積金對沖。對於強積金對沖，林鄭出席五大商會論壇：直情同啲商會主席硬碰硬，擦出火花，林鄭想游說商會取消對沖，總商會主席吳天海講到明：唔駛傾。取消強積金對沖，係工聯會、職工盟嘅強烈要求，在選委會，商界票多還是工人票多呢？如欲競選，必須諗清楚。
關於地鐵加價，有可加可減機制，最初由環境運輸局局長廖秀冬提出，後來政府與地鐵議定現行公式，工聯會與職工盟等工會民生派議員竟然ok，讓方案得以在立法會通過，地鐵當然掩住個口偷笑到𠵱家，錢果豐做地鐵主席期滿後，換上耍太極與玩公關、玩政治更加手段高強嘅馬時亨，林鄭遇上對手噃，馬時亨一招──叫政府用港鐵股息津貼車費──已經令運房局局長張炳良陷於被動，逼得大力否認，然則林鄭又有乜方法令港鐵就範？政府之內，恐怕冇乜高人啫。就因為冇乜高人做謀士，所以林鄭居然與民建聯同路，裏應外合，趁李慧琼率領陳克勤，葛珮帆等人約見，就話跟進「領展問題」，會召開跨部門會議商討對付領展。
由領匯上市至變成今日領展，有份投票贊成領匯上市嘅民建聯，與反對派梁國雄等等聯手，不斷發動與領展嘅抗爭，一啲嘢都爭取唔到，無端端林鄭加入反領展陣營，究竟搞邊科？真係為咗競選特首拉票？搞政治有時係可以去得好盡嘅，但領展坐大，反映政府食環署，房委會，房屋署管理街市與商場，實在不濟，直情係官僚失誤，自己做得差，林鄭護短，走去思量「解決領展」，近乎係反智咯。肥仔K睇見呢段新聞，笑咗一大輪，佢話讀書時，中學就在禾輋商場對面，成班同學到商場食飯，唔敢入廁所，情願走返學校男廁排隊，商場由領展管理後，現在肥仔K帶個兩歲女到禾輋商場，竟然敢直入廁所，因為「環境好得太多了！」見微知著，林鄭應該責成房屋署食環署做好本份，由30分改善到50分先，胡亂挑起火頭，目的可疑也。