今屆區議會「油尖旺票王」、公民黨最年輕區議員余德寶（得24歲仔咋），前日傍晚開始「烚吓烚吓」到噚晚凌晨至收工，究竟為咗乜？原來佢喺街坊協助下包咗500隻糭，前日傍晚6點開始同義工烚糭，最終烚到接近凌晨3點至完成，再喺下晝親手派畀街坊，兩小時內迅速派完。
德寶話，包糭主要喺室外進行，可以不時同街坊交流，過程唔算辛苦，最辛苦係之後喺辦公室內烚糭，由於個煲容量有限，每次只能烚約一百隻，每烚一次要搞3個幾鐘，所以烚到凌晨至搞掂。佢仲話啲糭係同街坊一齊親手整，同建制派純粹買番嚟再轉贈，相信會多一份人情味。