今屆歐國盃24支球隊喺周二交晒最後23人大軍名單，好多隊都有主力或人氣球員落選，慘成滄海遺珠。德國周二公佈歐國盃大軍名單，靚仔翼鋒馬高列奧斯繼2014世盃後再因傷落選，仲要喺正27歲生日正日知道，難怪馬里奧葛斯亦戥列奧斯慘：「真係傷透我個心。」葛斯喺2014世盃決賽頒獎禮上，就高舉印有列奧斯個名同號碼嘅德國波衫。至於較後時間公佈嘅西班牙，佢哋教練迪保斯基居然飛咗協助皇馬捧咗今屆歐聯嘅中場艾斯高，同埋今季好搶鏡嘅馬體會新超星沙奧尼古斯。
另外，上屆打入決賽嘅意大利同埋今屆主辦國法國，亦有主力因傷入唔到最後23人大軍。意大利教練干地決定唔選趕唔切傷癒復出嘅中場蒙杜利禾，蒙杜利禾亦係繼馬高華拉堤同埋馬治斯奧後，第三個因傷缺席今屆決賽周嘅意國星級中場；法國則有中場狄亞拉落選，教練迪甘斯就揀咗後補嘅舒尼達連去踢決賽周。
話時話，連埋之前一早落選嘅包括比利時後衞高柏尼、克羅地亞後衞洛夫雲、西班牙中場桑馬達、前鋒費蘭度托利斯同埋英格蘭前鋒韋碧克等，呢班球員足以組成歐國盃最強滄海遺珠陣容囉。