如果有大隻佬陪住做gym,大家可能有更fit爆嘅body。前加州州長兼國際影星阿諾舒華辛力加命名嘅運動節(The Arnold Sports Festival)首次落戶香港,8月19至21日喺亞博館舉行,阿諾屆時都來港會粉絲。呢個舉辦咗27年、以運動項目多過奧運做賣點嘅展覽,除咗有運動示範同產品,捐埋款仲可以同大隻佬共晉午餐!
捐款可共晉午餐
除咗俄亥俄州,今年運動節巡迴站包括巴西里約熱內盧、南非約翰內斯堡、西班牙、澳洲以及亞洲站代表香港,其中南非同香港都係首次進軍。據知阿諾都會來港,過往佢每次出席運動節都會舉辦座談會,仲同入場人士食lunch,今次香港站據知亦有呢兩項活動,當然要付費入場或捐款做善事。
其實運動節模式近似嘉年華,展出不同運動項目同器材,部份畀入場者試玩,去年就涉多達50運動項目,同時會舉辦比賽,重頭戲當然唔少得阿諾嘅強項──健美先生。
八方聽聞因為首度喺香港舉辦,展覽規模同運動項目會比美國少,而官網公佈嘅運動項目則有10種,除欖球瑜伽花式跳繩,連鋼管舞、大力士等較冷門運動都可試玩。據悉會有新式運動如單車馬球,運動員騎喺單車上揮桿打球,大部份運動均有教練指導及示範。
活動為期3日,公眾參與項目集中喺8月20同21日,主辦單位未透露票價,而展覽喺美國嘅票價分為預售門票及即場門票,前者每位15美元,後者每位20美元,可以玩盡場內大部份運動。
李八方
mailto:[email protected]