港足主帥金判坤「Die for Hong Kong」呢句出自嘅金句，相信有留意本地足球嘅球迷都唔會陌生。呢位帶領港足喺2018世界盃外圍賽連續兩次守和國足嘅南韓籍主帥，噚日又有新金句。對於足總主席梁孔德日前透露，中超球隊廣州富力好大機會參加下季港超聯，Kim sir大潑冷水：「I don't want to see dirty football（我唔想見到骯髒足球）」
黃威斷腳「兇手」踢富力
梁孔德前日出席賽馬會青少年足球發展計劃活動時，同記者透露下季可能有中超球隊參加港超聯，目前只係等中國足協批准，最有興趣嘅係廣州富力，佢哋有意派出青年隊，或者一隊副選球員嚟踢。事實上，上年喺省港盃將港足球員黃威鏟到斷腳嘅盧琳，就係效力富力。所以富力踢港超嘅消息一出，網民即刻鬧爆梁主席呢個諗頭。我求大俠噚日去將軍澳運動場探港隊班時，都搵咗港足主帥Kim sir問吓，睇吓佢對中超球隊踢港超有乜意見。
曾經執教過流浪同南華兩支本地職業隊嘅Kim sir話：「如果佢哋實力好強，對我哋都有幫助，因為我哋要面對一啲有質素嘅球隊；但必須係乾淨（clean）足球，我唔想見到骯髒（dirty）足球。香港形象好乾淨（clean）、好清晰（clear）、聰明、突出、有動力，如果佢哋想嚟就要咁，我哋好歡迎。」Kim sir回應時仲重覆咗三次乾淨（clean）呢個字㖭，可見佢好擔心國內球隊殺入港超嘅消息。
至於Kim sir所講嘅dirty football係啲乜，會唔會係盧琳粗野踢法嗰種dirty？大家可以自己諗諗。
Kim sir對中國足球真正點諗就不得而知啦，不過佢就肯定咁話聽日喺緬甸舉行嘅四角賽，好有信心會喺首場贏越南喎，噚晚港足就已經起程去到緬甸備戰啦。