咩係順開有條路，睇徐雨石同史卓豐呢對華洋組合就知，兩人剛周日於田草憑「一片光明」攜手食出尾糊，這晚快活谷夜馬，又合作以「非凡者」先拔頭籌。
第一場五班1650米，四歲馬「非凡者」馬主是西環海味街大亨庾柱林，他在那裏曾有棟「庾柱林大廈」，此駒由上季開始服役，這晚第17次出賽，初配史卓豐排10檔上陣，結果由早段到衝線都係最先一駒，就此放到爆6.4倍半冷Win開齋，組合獨贏A2派20元正。
今場蔡明紹策董事馬「威旺財」後上第二；大熱門由潘頓策騎的「領航大師」雖有湯盈盈等女星到場為馬主胡偉林打氣，但潘頓唔生性，出閘脫腳大讓賽，末段雖以勁勢於外欄殺上，但為時已晚，最終只得第三名，應贏變輸。第四名落在冷門「精彩時機」身上，四重彩派四萬蚊鬆啲。
徐雨石指「非凡者」取勝原因有三個，一是五班有利。二是上仗跑田草2200米雖然嫌長，但錯有錯着，收開氣之效。第三個原因是曾有騎師指「非凡者」一有馬壓迫即表現驚青，所以加眼罩讓牠更集中，結果此招成功。