行開性感嘅袁嘉敏（Candy）舊年10月同老外男友Kenneth拍拖，噚日就有報道指女方上月頭已飛甩對方，並指二人從來冇性關係。Candy噚日受訪承認此事，佢話舊愛鍾意當街攬住錫錫，因為咁就出事：「咁條街有人認得我，有次途人攞部電話錄低條片擺上微信。」
Candy又嘆佢一有新聞出街就會同舊愛嘈交：「佢覺得自己係生意人，每次見到報紙雜誌有我哋合照，好緊張叫人繙譯，當佢知報道唔係100%描述得佢啱嘅時候就會好嬲，每次同佢解釋都令到我好攰！」Candy自言保守，同舊愛關係只限攬錫：「我呢方面比較傳統，真係覺得穩定嘅，先會有進一步，我下次揀男友一定揀亞洲人，等訂婚嗰陣先會對外公佈。」
甩拖冇耐Candy就被影到同金融界猛人謝昭平撐枱腳，佢就話只係朋友否認戀情。問對方有冇家室？Candy表示：「做朋友唔會問人家庭狀況，不過知佢有小朋友。」
再盛裝食飯
噚晚7點45分左右，Candy着得靚靚喺舊山頂道住所離開步出，佢似乎佳人有約，一早已call定的士，所以一落樓就即上車，直駛太古廣場嘅Upper House，佢一入去就問bellboy餐廳位置，之後就上電梯直入餐廳，唔知着得咁靚約咗邊個呢？
撰文：馮仁昭