早前一個「一帶一路訪京團」變成「女伴唱K團」，搞到「一帶一路」令人增添不少想像空間，咁啱金管局總裁陳德霖（Norman）近日帶隊，帶一班銀行獨董與高層飛去西安考察，唔知佢有冇要求團員晚上不准外出，以免招惹是非呢？
研究一帶一路
其實Norman帶團都帶得幾密，舊年10月先至搵埋一班銀行獨董訪京，唔夠一年，仲帶埋銀行高層去西安，研究一帶一路，認真識得配合國情，對佢仕途實有幫助喇。
今次隨團賓架包括滙豐大中華區行政總裁黃碧娟、中銀香港（2388）總裁岳毅、渣打香港行政總裁陳秀梅、創興銀行（1111）副主席梁高美懿等人。
全部人分開前日與今日起程，行程至本周六（4日）完結。聞說今次行程跟上次差唔多，都係跟內地不同機構交流，當中自然包括中銀監，據聞中銀監主席尚福林都會到。
佢哋山長水遠去到西安，望住兵馬俑同古城，學一帶一路，應該可以發思古之幽情，不過最緊要都係團友們夜晚唔好周圍走，唱K跳舞肯肯定係禁忌。