巴西球王比利將會喺今個月七號至九號喺倫敦，攞自己超過2,000件珍藏出嚟拍賣。佢咁做只係想球迷同埋收藏家可以擁有佢嘅足球歷史；預計佢呢2,000件足球珍藏可以賣到70萬鎊（約787萬港元）左右，而且會全數作慈善用途。最貴嘅係一個雷米金盃仿製品，估價介乎273,000鎊至41萬鎊；至於佢嘅1958、1962同埋1970年世盃冠軍獎牌，估價係6.8萬鎊至137,000鎊；至於價錢較平嘅係慶祝佢50歲嘅巴西簽名波衫，估價介乎490鎊至630鎊。