投資最忌坐艇，近排賣樓成績贏盡全行嘅新地（016），噚日竟然請傳媒「坐艇」，喺正維港之上公佈前北角邨新盤名字，叫做海璇（Victoria Harbour），佢擔唔擔心大吉利是，買家將來要坐艇㗎，還是佢想寓意呢個樓盤經得起風浪呢？
雖然話樓市前景有隱憂，但新地「樓神」雷霆唔慳皮，繼續落本谷新盤宣傳，艇上面仲安排樂隊表演，好有氣氛。冇計喇，佢主要想話呢個新盤有無敵海景，咁咪直情喺海上做宣傳囉。
雷霆預告，呢個項目有機會喺第四季開賣，單位戶型有大有細。問佢點睇賣樓成績大幅拋離行家，佢即時好謙咁話「千祈唔好咁講」，仲話只係預售批得快啫。之不過，睇住雷霆面上嘅表情，就知道乜嘢叫「勝利的微笑」。