少林功夫加唱歌跳舞你知係乜，「富豪飯堂」福臨門加黃色沖涼鴨仔，你又估係乜？呢層，華華都想知。
噚日福臨門宣佈，跟設計「經典黃鴨」嘅本地工業家林亮合作，成立「添福香港」，以聯營公司與授權模式，將經典鴨系列生產唔同食品，同埋與飲食文化相關產品推出市場。
福臨門出名係名人飯堂，熟客中華置（127）大股東劉鑾雄（大劉）食到出晒名，惠理（806）主席謝清海都鍾意去食晏。唔知會唔會有一日，大劉去食飯叫隻片皮鴨，經理捧隻黃色鴨仔出嚟？囡囡秀樺又會唔會大叫「好打耳」？究竟福臨門同鴨仔，可以點樣Crossover而不失霸氣？真係拭目以待。
除咗食，今次雙方仲會另外成立「香江水暖慈善基金」做善事。