講得少又話冇答問題，講得詳細都俾人鬧，邊個咁慘豬？咪就係財庫局副局長劉怡翔囉！
立法會大會噚日其中一條口頭質詢關於一帶一路，建制派梗係爭崩頭發問，但口頭質詢一般得20分鐘，最終計埋官員發言，得張華峰、黃定光同廖長江有得問。
輪唔到葉劉淑儀發問，佢梗係嬲豬，向主席曾鈺成投訴話有程序問題。「主席我希望你提醒啲官員唔好講咁……用晒啲時間，搞到我哋冇得問，淨係講金融佢講晒。」佢仲手指指話：「仲有佢講得太快，劉局長你講嘢太快，知唔知即時傳譯跟唔到。」在席嘅劉怡翔一臉尷尬，葉劉鬧完就攞手袋就走人。
劉怡翔雖然有啲長氣，但兩次發言都係用咗唔夠7分鐘，商經局局長蘇錦樑開首發言用咗約7分半鐘；對上兩條質詢講領展分拆停車場，發展局局長陳茂波開頭發言都用咗近10分鐘，幾乎佢講晒，劉怡翔似乎無辜辜噃！