早幾日提過現評121分，姚本輝馬房的應屆冠軍一哩賽第三名馬「包裝奔馳」，將喺本月19號嘅1400米本地三級賽精英盃重配上季開齋騎師郭能，潘頓無緣重新沾手，不過潘頓亦好嘢，轉過頭呢場佢亦話咁快已卜定座騎，級數唔低過「包裝奔馳」，同樣夠晒震撼！
原來潘頓將會初騎高伯新旗下，富豪潘蘇通愛駒「大印銀紙」。潘頓表示，自己多年來同高伯新一向合作唔多，今季大家只合作贏過一匹「歡樂一生」，所以當近日高伯新搵佢騎「大印銀紙」嗰陣，潘頓話感到好驚喜，而且係佢哋繼今季初1400米三級賽慶典盃「誰可拼」落第後，兩人歷來第二次喺級際賽合作。
全港最高分灰馬(125分)「大印銀紙」上仗冠軍一哩賽只跑第8，但唔好忘記佢既係應屆香港一哩錦標亞軍，只不敵日本馬王「滿樂時」，亦係本季國際一級賽董事盃盟主，當日正擊敗潘頓嘅「戰利品」。潘頓話如果「大印銀紙」跑得番董事盃水準，絕對有權橫掃捧盃。