有「鞋公主」之稱嘅萊爾斯丹（738）執董兼行政總裁劉舜慧突然唔撈，話想做其他個人事務，8月底正式辭任。不過，識佢嘅人都知佢愛鞋如命，屋企入面收藏咗幾百對鞋，每日都要着唔同嘅鞋返工先滿意，鍾意買鞋，又做到間造鞋同賣鞋公司嘅CEO，其實係最開心，所以佢辭職都令人幾詫異。
劉舜慧第一份工，就係於未改名做萊爾斯丹前嘅利信達做見習生，之後兩出兩進，2007年升做CEO帶領公司發展。
不過，今年中港零售不景，即使公司為配合中國所用嘅商業名稱，提高品牌知名度，改名「萊爾斯丹」，惟仍未能挽救到業績，截至今年2月全年純利得1.29億元人民幣，按年急跌超過一半。
公司暫時未有新CEO人選，唔知會唔會捧個「鞋王子」出嚟呢？