近排漢能（566）大換血，主席李河君跳埋船，都令人再留意返細價股。噚日高銀孖寶之一的高銀地產（283）就開股東會，華華仲特登去睇吓，點知就大失所望，主席潘蘇通影都無。
問番公關，佢話原來噚日議程係審批出售項目，作為大股東、主席兼行政總裁的潘蘇通無份投票，所以嚟唔嚟無影響，加上仲有其他會要開先嚟唔到。
見唔到潘蘇通真身，有小股東就話好失望，惟有食件餅就走人。但唔知點解主席無影下，高銀孖寶反而股價越升越有，高銀金融（530）噚日彈咗近28%，連高銀地產都彈咗近14%，真係好特別。
同樣是細價股，同樣係主席唔見人，華華就難免諗起舊年5月漢能開股東會當日，一開市就股價腰斬，真係要講句同人唔同命，同遮唔同柄囉。