今季英格蘭球壇似乎特別多童話，繼李斯特城「灰姑娘式」奪得英超後，AFC溫布頓（圖）又喺周一英乙升班附加賽決賽以2:0擊敗普利茅夫，喺新球季會同佢哋嘅死敵米爾頓凱恩斯一齊喺英甲角逐。AFC溫布頓升班有乜咁特別？事緣14年前一班溫布頓球迷唔滿意球隊搬走，兼改名叫米爾頓凱恩斯，所以自組咗AFC溫布頓，由最低組別打起，連同周一場勝仗，足足升咗六級上英甲。咁神奇，連電影商霍士都有意將佢哋嘅事迹拍成電影！講番場波，替AFC溫布頓射成2:0嘅前鋒「肥豬王」艾堅費華原來已滿約，佢賽後呼籲各大球會畀份工佢㖭！