東方美籍洋將班尼斯噚日喺修頓處子登場，正選上陣得六分，表現令人失望，結果俾福建今場射到着火嘅歐陽維江攻入全場最高20分，以71:58爆冷擊敗呢支職業球隊。
身高2米03嘅班尼斯一上陣已經獲在場球迷歡呼，可見佢幾受重視，但表現卻不似預期，首節只射入兩個罰球得兩分，攞分唔多，但上場七分鐘已經攞到五個籃板，防守都算稱職。要爭前四入季後賽嘅福建，分數上死咬住東方，首節打成20:20平手。
第二節打得好緊湊，曾經有超過三分鐘兩隊都冇得分，但福建喺呢節中後段攻勢凌厲，歐陽維江三次三分波全中，幫球隊以36:33領先東方。
換邊後福建攻勢繼續浪接浪，中鋒司徒偉傑喺籃下連拎八分，一度拉開11分差距。雖然東方有李琪射入三分波追近46:51，但歐陽維江完第三節前射入壓哨三分，除咗令球隊士氣大振，仲領先東方56:47。
最後一節福建繼續保持領先優勢，最後以71:58擊敗東方，一齊攞到季後賽資格。今場三分波八射六中嘅歐陽維江賽後好激動：「大家辛苦咗咁耐，好難忘，對自己嚟講，贏到職業球隊係一個認同。」
頭場遊協以81:65擊敗晉龍，最後以第七名晉身季後名次賽。另外永倫主將泰那因訓練時受傷，預計要唞六至八個星期，周五對南華將會缺陣。
