唔知呢半年大家去海洋公園時，有冇留意多咗啲導賞員喺度講解？原來海洋公園同華懋集團合作搞保育，去年12月至今年5月期間，邀請11,000個低收入家庭免費去海洋公園，又同時培訓咗24個義工導賞員，當中8人係退休長者，講解動物保育。
要做導賞員首先要過三關，包括用英文自我介紹，用普通話講解動物習性，又要隨機抽籤同指定對象解說，唔只要求好嘅溝通技巧，仲要考60頁紙咁厚嘅資料。嘩！後生仔要記嘢都有難度，八方真係佩服呢班老友記。
華懋集團執行董事兼行政總裁楊光話，今次一共贊助110萬元，好開心有更多人認識動物保育，會繼續贊助。海洋公園營業及市場總監李玲鳳就同八方講，國外唔少博物館同藝術館都有長者義工導賞，今次活動反應正面，新一輪招募會喺暑期開始。